திருமணநாள் நிச்சயிக்கும் முறை

திருமணநாள் நிச்சயிக்கும் முறை

திருமண வைபோகம் மிக முக்கியமான சுப காரியமாகும். திருமணம் என்பது ஆயிரம் காலத்து பயிர் என்பார்கள். எனவே நல்லதொரு திருமண நாளை நிச்சயித்து கொள்ளுதல் நலமாகும். திருமண நாளை எப்படி நிச்சயிக்க வேண்டும் என்பதை தெரிந்து கொள்ளுவோம்.

திருமணம் மல மாதத்தில் இடம் பெறக்கூடாது, மல மாதம் என்பது இரண்டு அமாவாசை அல்லது இரண்டு பௌர்ணமி ஒரு மாதத்தில் இடம் பெரும் மாதம் ஆகும்.

சுக்கில பட்சம் தவிர கிருஷ்ண பட்ச காலங்களில் திருமணம் செய்யக் கூடாது. புதன், வியாழன், வெள்ளி போன்ற சுப கிழமைகளில் மட்டும் திருமணம் செய்யலாம். மற்ற கிழமைகள் அவ்வளவு உகந்தது அல்ல.

ரிஷபம், மிதுனம், கடகம், சிம்மம், கன்னி, துலாம், தனுசு, மீனம் ஆகிய சுப லக்கினங்களில் தான் திருமணம் நடத்த வேண்டும். இதர லக்னங்களில் நடத்தக் கூடாது.

திருமணம் துவதியை, திரிதியை, பஞ்சமி, சப்தமி, தசமி, திரயோதசி ஆகிய சுப திதிகள் தவிர இதர திதிகளில் நடைபெறக் கூடாது.

திருமணம் ரோகிணி, மிருகசீரிஷம், மகம், உத்திரம், உத்திராடம், அஸ்தம், உத்திரட்டாதி, சுவாதி, அனுஷம், மூலம், ரேவதி ஆகிய சுப நட்சத்திரங்கள் தவிர இதர நட்சத்திரங்களில் நடத்தக் கூடாது.

திருமணம் அக்னி நட்சத்திரம், மிருத்யு பஞ்சகம், கசர யோகங்கள் போன்ற அசுப காலங்களில் நடைபெறக் கூடாது.

திருமணத்தின் போது குரு, சுக்கிரன் போன்ற சுப கிரகங்கள் திருமண லக்னதிற்கும், மணமக்கள் ஜனன ராசிக்கும் எட்டாம் வீட்டில் இடம் பெறக் கூடாது.

மணமக்கள் பிறந்த தேதி அல்லது கிழமைகளில் திருமணம் நடைபெறக் கூடாது.